“Ես ակումբի”՝ ամառային առաջին հյուրերը`Նարեկ Բավեյան և Նորո

Մոտ վեց ամիս ժամանակավոր բաժանումից հետո այս անգամ “Նարեկացի” մշակույթի կենտրոնում “Ես Yes ”- ասերներին հյուր եկան հայկական շոու- բիզնեսի երիտասարդ, բայց արդեն ամենապահանջարկված երգիչներ Նարեկ Բավեյանը և Նորոն: Ավանդույթի համաձայն, մեր ակումբի անդամները հնարավորություն ունեցան հարցեր հղել, պարզապես զրուցել, ինքնագրեր վերցնել ու լուսանկարվել իրենց սիրած երգիչների հետ: Ներկայացնենք ակումբականների հնչեցրած հարցերից ամենահետաքրքիրները:

- Նարեկ, հնարավո՞ր է հաջորդ տարի քե՛զ տեսնենք “Եվրատեսիլում”:

Նարեկ- Հավանաբար` ոչ: Այժմ ես այլ ուղղությամբ եմ աշխատում: Փորձում եմ կենդանի ձայնով հնարավորինս լավ երգել: Եթե նույնիսկ մեկ տարի հետո պատրաստ լինեմ, միևնույն է, չեմ գնա. հերթ կա, բան կա… ( ծիծաղում է): Իմ կարծիքով` հաջորդ տարի մրցույթում Հայաստանը պատվով կարող է ներկայացնել Ռազմիկ Ամյանը: Շատ լավ երգիչ է, շատ լավ ձայն ունի:

- Երգում ես “Վերջին անգամ”, իսկ վերջին անգամ ե՞րբ ես սիրահարվել:

Նարեկ- ( Նարեկը սկսեց բարձրաձայն հաշվել, երկար մտածելուց հետո պատասխանեց:) Չորս տարի առաջ…

- Որտե՞ղ և ո՞ր երգի տակ ( ժամանակ) կարելի է սեր խոստովանել:

Նորո- Եթե հանդիպել ես նրան, ում ուզում ես սեր խոստովանել, կապ չունի՝ ինչ երգ է: Ուզում է` Արման Բարդումյանի երգը լինի: Կապ չունի:

Նարեկ- Ճիշտն ասած, ես մի քիչ կհամբերեի ու կանջատեի այդ երգը ( ծիծաղում է): Իսկ եթե ավելի լուրջ` լավ տարբերակ է Boys 2 man խմբի Close your eyes, make a wish երգը: Երբ 14 տարեկան էի, Գլենդելում 16- ամյա Դիանա անունով մի աղջկա հենց այդ երգի ներքո սիրո խոստովանություն արեցի… Մեր սիրավեպը տևեց երեք ամիս:

- Չե՞ք կարծում, որ երգչին երկրպագելը աղջիկներին նվաստացման է հասցնում:

Նարեկ- Չեմ կարծում, թե դա նվաստացում է: Կարծում եմ` երգչին կամ երգը սիրելը նվաստացում չէ: Ես էլ մեծացել ու դաստիարակվել եմ Սթիվի Ուանդերի երգերով և եթե մի օր նրան տեսնեի, առանց վարանելու կասեի այդ մասին: Եթե երգիչը չի պատասխանում երկրպագուի հեռախոսազանգին, նամակին կամ sms- ին, չի նշանակում, թե նվաստացնում է նրան:

- Odnoklassnik.ru կայքում չկաս, ի՞նչու:

Նարեկ- Կայքում չեմ գրանցվել, որովհետև դա նման է արևածաղկի սերմերից կամ ծխախոտից կախում ունենալուն: Շուտով կունենամ իմ սեփական ինտերնետային կայքը, որտեղ երկրպագուները կարող են իրենց կարծիքը գրել:

- Պատասխաններիցդ ենթադրելով՝ հումորով ես երևում:

- Նարեկ- Այո, սիրում եմ ծիծաղել: Անեկդոտներ էլ եմ սիրում պատմել: Օրինակ՝ վերջին լսածս կարող եմ պատմել: Ապարանցիները բիլիարդ խաղալու են գնում, շատվոր են լինում, սեղանները միացնում են իրար: Կամ էլ` կոռոլյոկը գնում է Ապարան ու բոլորին խեղդում:

- Ի՞նչ եք կարծում` Հայաստանում շոու- բիզնես կա՞:

Նորո- Իհարկե, հայկական շոու- բիզնեսը դժվար է համեմատել առաջատար պետությունների շոու- բիզնեսի հետ: Ամեն դեպքում մեզ մոտ էլ է շատ բան փոխվում, ու մենք քիչ- քիչ առաջ են գնում: Հուսով եմ` հետագայում կկարողանանք ներխուժել նաև միջազգային շոու- բիզնես: Ես լավատես եմ:

- Ասում են` կյանքը բեմ է, մարդիկ` դերասան: Ձեր դեպքում այդպե՞ս է:

Նարեկ- Եթե նույնիսկ այդպես է, ապա ես իմ դերը հաճույքով եմ կատարում: Ամենակարևորը` պետք է խղճիդ առաջ ազնիվ լինես:

Նորո- Կարծում եմ` մեզ շնորհք տված է վերևից, մենք զբաղվում ենք մեր սիրած գործով ու շատ լավ է, որ դրանով երջանկացնում ենք նաև մարդկանց:

- Ինչի՞ մասին եք երազում:

Նարեկ- Երազում եմ ամուր և սիրով ընտանիքի մասին: Կցանկանայի երկու երախա ունենալ` տղա և աղջիկ: Երազում եմ նաև շատ շրջագայել:

Նորո- Ես էլ երազում եմ յոթ տղա ունենալու մասին: Դա իմ ամենամեծ երազանքն է: Երազում եմ նաև ընդալայնել ընկերական “ընտանիքս” ու միշտ լավ ընկերներով շրջապատված լինել:

Հարցերը` “Ես” ակումբականների

Լուսանկարներ

“Ես ակումբի”՝ ամառային առաջին հյուրերը`Նարեկ Բավեյան և Նորո